Psalms 80

Maombi Kwa Ajili Ya Kuponywa Kwa Taifa

(Kwa Mwimbishaji: Mtindo Wa Yungiyungi. Zaburi Ya Asafu)

1 ^aEe Mchungaji wa Israeli tusikie,
wewe umwongozaye Yusufu kama kundi;
wewe uketiye katika kiti cha enzi
katikati ya makerubi, angaza

2 ^bmbele ya Efraimu, Benyamini na Manase.
Uamshe nguvu zako,
uje utuokoe.

3 ^cEe Mungu, uturejeshe,
utuangazie uso wako,
ili tuweze kuokolewa.

4 ^dEe Bwana Mungu Mwenye Nguvu Zote,
hata lini hasira yako itawaka na kufoka moshi
dhidi ya maombi ya watu wako?

5 ^eUmewalisha kwa mkate wa machozi,
umewafanya wanywe machozi bakuli tele.

6 ^fTumekuwa chanzo cha ugomvi kwa jirani zetu,
na adui zetu wanatudhihaki.

7 ^gEe Mungu Mwenye Nguvu Zote, uturejeshe;
utuangazie uso wako,
nasi tuweze kuokolewa.

8 ^hUlileta mzabibu kutoka Misri,
ukawafukuza mataifa, ukaupanda.

9 Uliandaa shamba kwa ajili yake,
mizizi ikawa imara, ukajaza nchi.

10 Milima ilifunikwa kwa kivuli chake,
matawi yake yakafunika mierezi mikubwa.

11 ⁱMatawi yake yalienea mpaka Baharini, ▼

▼ Huenda inamaanisha Bahari ya Mediterania.

machipukizi yake mpaka kwenye Mto. ▼

▼ Yaani Mto Frati.

12 ^lMbona umebomoa kuta zake
ili wote wapitao karibu
wazichume zabibu zake?

13 ^mNguruwe mwitu wanauharibu
na wanyama wa kondeni hujilisha humo.

14 ⁿTurudie, Ee Mungu Mwenye Nguvu Zote!
Tazama chini kutoka mbinguni na uone!
Linda mzabibu huu,

15 ^omche ulioupanda kwa mkono wako wa kuume,
mwana uliyemlea
kwa ajili yako mwenyewe.

16 ^pMzabibu wako umekatwa, umechomwa moto,
unapowakemea, watu wako huangamia.

17 ^qMkono wako na utulie juu ya mtu aliyeko mkono wako wa kuume,
mwana wa mtu uliyemlea kwa ajili yako mwenyewe.

18 ^rNdipo hatutakuacha tena,
utuhuishe, nasi tutaliitia jina lako.

19 ^sEe Bwana Mungu Mwenye Nguvu Zote, uturejeshe;
utuangazie uso wako,
ili tuweze kuokolewa.